Reformiertes kirchenblatt Oktober 2003 [antikvár]

Sehr geehrta Herr Professa, Se wem Si wahrscheinlich wundern, daß ich Ihna an Briaf schreib, weil Se mi ja gar net kennan. Aber tröstens Ihna, i kenn Ihna ja a net. Wieso i Ihna dann übahaupt schreib, woins wissen. Na ja, dran is der evangölische Pfarra schuld, bei dem i seinazeit fast evangelisch gheirat hätt1, de haße Billeteurin. Aba dann hab i do net, weil i hab gspürt: a Evangelist wird aus mir nia werdn. Also - wia gsagt- der Pfarra hat mir gsagt, daß Sie Ende Oktober Geburtstag haben, und daß Sie a hoher, gscheiter Herr san, und daß Ihna grad deswegen freun taten, wann a Mann aus dem Volke - so ana wia i halt - alles Guate wünschat. Wia ma der Pfarra gesagt hat, daß Sie a Theologieprofessa san - übrigens klass, wias Ihna des gricht1 ham, wo's do in Österreich fast gar kane Evangelisten gibt - da is ma zum ersten Mal so richtig aufgfallen, was für a große Rolle die Kirchen in mein Leben spielt: I zahl kan Kirchenbeitrag - katholisch bin i scho, aba net deppat - mei erste Frau hab i kirchlich gheirat, na ja und dann bin i Kassier bei an Sterbeverein gwesen. Se san zwar nur evangölisch, aba des is heut ja alles eh scho wurscht, wo mia doch alle ökumenisch denken. I kann Ihna nur sagn, wer a Kirchn kennt, der kennt alle - i könnt Ihna da Sachen erzählen I brauch ka Kirchn für mei Religion:" Ich glaube an ein höheres Wesen. An eine Macht, die uns leitet": Im Grund glauben mia zwar wahrscheinlich eh an den selben Herrgott. Sie wissen eh, es gibt Zeiten, da glaubt ma an gar nix, aba dann siechst so a schene große Kirchn und denkst da, es kennt scho was dran sein. Der Pfarra hat ma a dazählt, was Sie Ihm Studenten so sagn - übrigens i hab ghört, daß bei Ihna a viel Madin was lerna wollen: also i sag Ihna, da könntens no was von mia lernen. Aba sans froh, daß i net a Student bei Ihna bin, weil Sie san mir zu modern. Weil - gelt - grad de Kirchn muaß do denea Leut zagn, wo Gott wohnt. "Gottes Mühlen mahlen langsam, aber sicha !" "Hilf dir selbst, dann hilf dir Gott!" und andere Sinnsprüche, sowas soll die Jugend lerna. Aba was tuan Sie, was hab i da ghört: Sie untergraben de Macht des Mannes, Se haun eam die Krone der Schöpfung vom Schädel; aba, i kann Ihna nur ans sagn: "A Mann is a Mann, wann er a richtiger Mann is. Die Frau ist der gebende Teil und der Mann ist der herrschende." Na ja, und an de Judn haben Se ja angeblich a an Narren gfressen. Schauns, i bin ja a dagegen, daß sas alle umbringen, aba wann ma menschlich is, dann erntet ma nur Undank. So wias mir mitn alten Tennenbaum passiert is. A Linka sollns übrigens a no sein. Liaba Herr Professa, i vasteh Ihna, i war ja bis 1934 Sozialist. Aba wann ma eine gewisse Reife hat, dann spürst: davon kann ma a net lebn. Nur wer seine Ideale verraten hat, waß, was a Weanerherz fühlt - in sein Schmerz. I waß net, ob sie des vastehn, Sie san ja a Schweizer, aba mia Österreicher san ja kane politischen Menschen. Wann i mas so genau überleg1, Sie müssen a bedeutender Mensch sein, weil i kann nix mit dem anfangen, was sie sagen. Net amal a Bildl kann i Ihna abkaufn, weil i hab mei ganzes Leben ka Zeit ghabt für Kunst oder solche Sachen. I hab Wichtigeres z'tuan ghabt. Und trotzdem tua i Ihna bewundan, weil mir geht's mit Ihna wia mit ana schenen, großn Kirchn, wann i vorbeikomm'. Da denk i ma, vielleicht is do was dran. Also dann wünsch i Ihna alles Guate zum Geburtstag, viel Glück und Gesundheit - Hauptsach, ma is gsund. Ja und weil i grad beim Wünschen bin: Se gengan ja jetzt bald in Pension. I sag Ihna, des is so, als würd ma a zweites Mal geborn werdn, in aner scheneren Welt. Jetzt brauchns Ihna von niemand mehr sekkieren lassen, jetzt kennans endlich tuan, was Sie wollen, jetzt brauchns gar nix mehr tuan. Habediere, auf Wiedersehen und überhaupt Ihr Karl P.S.: I kann natürlich net Maschinschreibn, aba weil Sie mei Schrift net lesen könnten, hab i die Prchal Michaela bitt', daß ma den Briaf aschreibt, weil nämlich ihr Vata, a Wirt, Sie wem eam net kennan, a alte Schreibmaschin hat, Vorkriegsqualität. Se wissen scho. A paar Fehler hat's halt g'macht. PETER KARNER